الثلاثاء , نوفمبر 7 2017

“أنا أسفة ” من ديوان صوت الفراشات للشاعرة “مها الغنام”

عشان عارفة إنّى حبيتك بدون نية ومن غير قصد

وقابلة الصد من يَمك

لكنّه ياريت يكون بشويش

 وعاوزة أعيش

بدون نظراتك الدافية

 بدون تصميم تكون النيّة مش كافية

ومش شايفة بشرغيرك

وجودك ماحى كل الناس

ومش عايزة أجرب حتى إنّى أنساك

واتحداك

تلاقى عاشقة للأوجاع لهذا الحد

 قمر انت وقلبى البحر

وبينّا ألف جزر ومد

 مفيش داعى تحلّفنى

 دا سرك مش حقوله لحد

لذا فاهملنى كالعادة

رسايلى اتركها من غير رد

 يا أجمل حد حبيته

ودعيت الله أكون وطنه واكون بيته

ولو موج الحياة تعبك

 أكون لك شط

وبعض دُعايا متأجل

لذا برجوك يكون الصد من يَمك

علاج قاسى

لقلبى اللى بيستعبط

وعامل ناسى

ان انت ماكنتش ليه وﻻ حتكون

وكله يهون مادام انت

ف هذا الكون

مِهَون دنيتى الصعبة

أنا لعبة

ف ايد عيل بيلعب بارتياح بيها

وبعد شوية يزهدها فيرميها

ومش من حقى اتمرد

مجرد فكرة التغيير بترعبنى

فلو حتسيبنى ماتقوليش

 وقوللى ازاى تحاسبنى على جنونى!!

 ماتقبل طيشى كما هوه بدون تعديل

حتعمل إيه ف قلب أسير

 لنبرة حزينة فى صوتك

 بدون تفسير!!

أنا آسفة إنّى حبيتك

وواثقة مهما زاد عِندى

 حتعذرنى

برئ قلبك كما اتعودت إنّى ألقاه

 وراح يفضل كما هو بدون تغيير

***

من ديوان صوت الفراشات . للشاعرة مها الغنام

شاهد أيضاً

صور .. ميدان البحيرة ترصد تفاصيل افتتاح معرض الكتاب الأول بمركز الابداع بدمنهور .. ولقاء خاص مع مدير التسويق بهيئة الثقافة

تغطية – أريج منصور ، علا شكيب ، مريم خالد ، مي عمر شهد مركز …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *